|
Tollentes duas vaccas junxerunt ad plaustrum, vitulosque earum
recluserunt domi, et posuerunt arcam Dei super plaustrum: ibant autem
vaccae in directum per viam quae ducit Bethsames: et itinere uno
gradiebantur, pergentes, et mugientes, et non declinabant neque ad
dextram, neque ad sinistram (I Reg. VI). Bethsames, intrepretatur domus
solis. Si igitur ad aeterni Solis habitationem tendimus, ab itinere Dei
pro carnalibus affectibus non declinemus. Pensandum est autem quod
vaccae, quae sub arca Dei plaustro religantur, pergunt et gemunt, non
tamen ab itinere gressus flectunt. Sic praedicatores Dei, et quilibet
fideles intra Ecclesiam esse debent, ut proximis compatiantur per
charitatem, nec de via Dei exorbitent per compassionem. Arca Dei
superposita, Bethsames pergere, est cum superna scientia ad internae
lucis habitaculum propinquare. Quod vere facimus, cum pro affectu
propinquorum non declinamus. Sic enim incedere debent qui sacrae legis
jugo suppositi per internam scientiam arcam Dei portant. Quatenus per
hoc, quod propinquorum necessitatibus condolent, a coepto rectitudinis
itinere non declinent. Quorum nimirum gratia mentem nostram tenere
debet, sed reflectere non debet, ne haec eadem mens, aut si affectu non
tangitur, dura sit; aut plus tacta, sit in fletu remissa.
|
|
