|
Congregati majores natu de Israel venerunt ad Samuelem in Ramatha,
dixeruntque ei: Ecce tu senuisti, et filii tui non ambulant in viis
tuis: constitue nobis regem, ut judicet nos, sicut et universae habent
nationes (I Reg. VIII). Et erat vir de Benjamin nomine Cis, filius
Abiel, filii Seor, filii Bechorath, filii Sareth, filii Aphia, filii vir
Jemini, fortis robore. Et erat ei filius vocabulo Saul. Perierant asinae
Cis, patris Saul; et dixit Cis ad Saul filium suum: Tolle tecum unum de
pueris; et consurgens vade, et quaere asinas. Et quaesivit et venit ad
Samuelem, et introduxit eum Samuel in triclinium et dedit ei locum inter
eos, qui fuerant invitati ad prandium (I Reg. IX). Et tulit Samuel
lenticulam olei; et unxit eum in regem (I Reg. X). Saul, qui offenso Deo
factus est rex super Israel, Judaeos significat. Sicut enim ipse durus,
et superbus, et rigidus effectus est, ut eos servili onere magis
premeret quam liberaret; sic populus Judaeorum quamvis unctus in
sacerdotibus et regibus, tamen (quia ancillae filius erat quae in
servitutem generabat) nunquam perfectam libertatem per ipsam unctionem
consequi potuit: praecipue quia regem Christum mansuetum et humilem
recipere noluit, per cujus dominationem potuit liberari. Saul petitio
interpretatur, qui fuit de stirpe Benjamin hac generationis serie,
filius Cis, filii Abiel, filii Seor, filii Bechorath. Et haec nomina
bene exprimunt typum Judaeorum. Benjamin quidem interpretatur filius
dextrae; Cis, durus, vomitus viri vel vomens vir; Abiel, pater meus
Deus; Seor, parvulus sive turbulentus; Bechorath, primogenitus filius.
Israel ergo, qui fuit primogenitus Dei, et pater ejus Deus, fuit filius
dextrae, quia saepe per auxilium Dei confortatus hostibus suis
praevaluit. Sed quia semper ingratus exstitit beneficiorum Dei, et durae
cervicis, in blasphemiam erupit, de magno parvulus, et de placido
turbulentus effectus est. Quod Saul asinas patris sui quaerit,
significat quod Judaei stultitiam carnalis sensus sequentes, per errores
devios luxum mundi quaerunt. Asinus enim brutum et luxuriosum animal
est. Qui ad prophetam venientes, id est ad Moysen, audierunt inventas
esse asinas, id est, bona terrae se comesturos esse didicerunt: a quo
eis et unctionis oleum, et regni gubernaculum promittitur: in quibus ad
tempus fratres suos de manu hostium suorum eriperent. Qui Samuel Saulem
in excelsum ducit et ibi illi refectionem tribuit, significat Moysen et
prophetas populum Hebraeorum doctrinis suis ad altiora provocantes, ut
scientia spiritali refectus, in culmine virtutum consistat, nec
relabatur ad vitia. Tulit Samuel lenticulam olei. Lenticula, vas fictile
quadrangulum habens foramen, per quod fragilitas regni designatur.
|
|
