|
Ascendit Naas Ammonites, et pugnare coepit adversus Jabes Galaad.
Dixeruntque omnes viri Jabes Galaad ad Naas: Habe nos foederatos, et
serviemus tibi. Et respondit ad eos Naas Ammonites: In hoc feriam
vobiscum pactum, ut eruam omnium vestrum oculos dextros. Bellum Naas, et
exercitus ejus contra Israel, significat bellum diaboli et haereticorum
contra Ecclesiam. Naas interpretatur serpens; Ammon, comprimens vel
angustans, vel populus moeroris, Jabes, exsiccata; Galaad, acervus
testimonii. Naas ergo significat serpentem antiquum, qui est princeps
Ammonitarum, id est haereticorum, qui bene populus moeroris dicitur,
quoniam gaudium Spiritus sancti non habent. Qui disposuit foedus cum
populo Ecclesiae, ut eruat omnium oculos dextros et visum sanae et
orthodoxae fidei auferat. Sic enim vult eos habere foederatos, ut
sinistrum oculum habentes, ea tantum quae prava sunt et ad sinistram
pertinentia sentiant. Sed mens fidelium exsiccata ab omnibus sordibus
vitiorum, acervum testimonii, id est sententias sacrae Scripturae
congerit: quibus viriliter resistat hostibus. Et Saul in tribus
millibus. Naas et exercitum ejus vincit, dum Christus per fideles
doctores fide Trinitatis insignes versutias diaboli et haereticorum
fugat, et de Ecclesiae foribus expellit. Percutit eos a vigilia matutina
usque dum incalesceret sol (I Reg. XI), id est a principio fidei clare
sciens, usque ad fervorem perfectae dilectionis.
|
|
