|
Dixit Jonathas ad adolescentem armigerum suum: Veni, transeamus ad
stationem Philisthinorum. Erat autem inter ascensus, per quos nitebatur
Jonathas transire ad stationem Philisthinorum, eminentes petrae ex
utraque parte, et quasi in modum dentium scopuli hinc inde praerupti (I
Reg. XIV). Jonathas, columbae donum interpretatur; ii sunt qui dono
Spiritus sancti replentur, per quos Dominus haereticorum conventus
dissipat, atque in fugam vertit. Armiger ejus, spirituales discipuli,
qui non planam, sed arduam viam arripiunt, quia sacerdotes hostibus
contraire nequeunt, nisi per arctam viam gradientes, inter utrumque
testamentum, et inter prospera et adversa, quasi inter duos scopulos
dextra laevaque incedant, et ad alta contemplationis tota mente tendant;
Jonathas vero non nisi provocatus ad hostes transit, quia Catholici
adversus haereticos contentionem non movent, nisi prius ad certamen
provocentur. Jonathas in agro culturae hostes prosternit, et doctores in
meditatione Scripturae haereticos vincunt.
|
|
