|
Jonathas extendit summitatem virgae, quam tenebat in manu, et intinxit
in favum mellis, et convertit manum suam ad os suum, et illuminati sunt
oculi ejus (I Reg. XIV). Jonathas, columbae donum, hic eos significat,
qui accepta sancti Spiritus gratia, mundi parant spernere illecebras.
Non enim potest contra Allophylos spirituales, id est daemones viriliter
pugnare, qui mundi dulcedinem nequit declinare. Illuminati sunt oculi
ejus, non ad videndum, qui ante videbat, sed ad discernendum, qui
vetitum tetigerat. Tunc enim casus ille, sicut et Adam, fecit illum
attentum, reddiditque confusum. Quo facto, monetur omnis qui Deo vult
militare, omnes voluptatum illecebras debere contemnere. Mel enim
distillant labia meretricis (Prov. V.), id est voluptas carnalis
delectationem ingerit illicitam. De qua mystice putatur Jonathas
gustasse, et sorte deprehensus, vix precibus populi liberatus est. Unde
patet eum, qui mundi voluptate superatur, sanctorum suffragiis et
fraternis orationibus indigere; quia, quanto majore protervia contra
unanime consilium ecclesiasticae regulae refragatus est, tanto majore
eget auxilio plurimorum, ut qui suo merito salvari non potest, aliorum
devotis precibus reconciliatus, ab instanti periculo liberetur.
Liberavit ergo Jonatham populus, ut non moreretur. Multum enim prosunt
transacta bona. Nam, nisi Jonatham praeterita bona juvissent, imminentia
mala non evasisset. Non enim injustus Deus, ut obliviscatur bonorum
(Hebr. VI).
|
|
