|
Elcana Dei possessio interpretatur, qui animi virtute vir dicitur. Et
unus, non mobilis, non vagabundus, sed firmus et inconfusus. Omnes etiam
competenter unus dicuntur, unam sapientiam habentes: qui unum Jesum
Christum confitentur, uno spiritu Dei replentur. Unde insipiens sicut
luna mutatur (Eccli. XXVII). Unus autem Deus dicitur non numero, sed
quia non mutatur, unde scribitur: Tu autem idem ipse es, et anni tui non
deficient (Psal. CI). Unde et Apostolus: Omnes quidem currunt, sed unus
accipit bravium (I Cor. IX). Unusquisque insipientium non est unus, sed
multi. Elcana, praedicator, quem Dominus possidet. Phenenna et Anna
activa et contemplativa vita. Phenenna fecunda in filiis et filiabus;
activa, fortia gignens opera et infirma. Phenenna interpretatur
conversio; quia activa ad actiones, quibus prosit proximis, necesse est
ut sollicite convertatur. Activa enim vita est panem doctrinae esurienti
tribuere, errantem corrigere, ad humilitatis viam superbum revocare,
infirmantis curam gerere, quae singulis expediant dispensare. Anna
interpretatur gratia, quia contemplatio habetur per gratiam. Haec est
sterilis; quia eum eam, prout est, nullus penetrare valeat, nullus quod
id ea sentit praedicare sufficiat, contingit ut eam praedicando nemo
plures filios gignat. Contemplativa, est charitatem Dei et proximi mente
retinere, ab exteriore quiescere, soli desiderio Conditori inhaerere, ut
nil jam de exterioribus agere libeat. Qui vult effici possessio Dei, has
duas ducat uxores, activam prius, et contemplativam deinceps. Praecipue
doctor ex amplexibus Phenennae transeat ad amplexus Annae, utrique
partes tribuat, virtutibus virtutes subnectens.
|
|
