|
Egressus est Israel obviam Philisthiim in praelium, et castrametatus est
juxta lapidem adjutorii. Porro Philisthiim venerunt in Aphec, et
instruxerunt aciem contra Israel. Inito autem certamine terga vertit
Israel Philisthaeis, et ceciderunt passim per agros, quasi quatuor
millia virorum (I Reg. IV). Israel vir videns Deum, et fortis cum Deo.
Philisthiim, cadentes poculo, scilicet daemones: qui poculo superbiae
inebriati, et ipsi ceciderunt, et homines pervertere festinant. Contra
quos Israel, id est fideles ne cadant, sed superent, castrametantur
juxta lapidem adjutorii. Lapis adjutorii, Christus est, de quo scriptum
est: Lapidem quem reprobaverunt aedificantes: hic factus est in caput
anguli (Psal. CXVII). Juxta quem fideles, ut eum inveniant adjutorem,
castrametantur, dum in lege Domini meditantur. Sed Philisthiim veniunt
in Aphec, id est furorem novum; quia, dum fideles divinis legibus
amplius insistere prospiciunt, immundi spiritus, acriora et nova
certamina constituunt. Unde eos, hoc est fideles non in Domino, sed in
suis viribus confidentes et in humana sapientia gloriantes, ac per hoc
gratiam Evangelii contemnentes, quasi quatuor millia facile prosternunt.
|
|
