|
Philisthiim tulerunt arcam Dei: et asportaverunt eam in Azotum (I Reg.
V). Azotus interpretatur ignis patris, vel incendium. Bene sic vocatur
locus ubi erat idolum Dagon, quia adventus arcae Dei in Azotum erat
incendium diaboli patris omnium iniquorum. Dagon, qui interpretatur
piscis tristitiae, significat diabolum, qui in mari hujus saeculi
devorat peccatores, qui et in Job Leviathan, et Behemoth (Job XL),
nuncupatur. Caput Dagon, et duae palmae manuum ejus abscissae erant
super limen (I Reg. V). Caput Dagon, significat superbiam diaboli, a quo
initium peccati fuit, quia per omnem orbem terrarum idololatriam
constituit. Duae palmae, operationem idololatriae; limen, finem impiae
culturae.
|
|
