|
Ascendit David in Hebron, et duae uxores ejus. Sed et viros qui erant
cum eo, duxit David singulos cum domo sua (II Reg. II). Ascensio David
cum duabus uxoribus in Hebron, significat convocationem duorum populorum
in Ecclesiam catholicam. Hebron enim interpretatur conjugium; sola enim
Ecclesia coelestis regis sponsa est. Illuc duxit David singulos cum domo
sua, quia singuli fideles in illam societatem per evangelicam
praedicationem convocantur. Non est ibi distinctio Judaei et Graeci
(Rom. X). Fuit numerus dierum per quos commoratus est David, imperans in
Hebron super domum Juda septem annorum et sex mensium. David septem
annis et sex mensibus regnavit in Hebron, quae interpretatur conjugium
vel visio sempiterna; quia Christus in Ecclesia (quae est ejus sponsa)
per omne tempus hujus vitae (quod septenario dierum numero decurrit)
regnat, secundum illud: Ecce ego vobiscum sum omnibus diebus: usque ad
consummationem saeculi (Matth. XXVIII). Et quia post expletionem
senarii, id est perfectionem boni operis, electos suos ad secundum
Sabbatum, id est requiem sempiternam perducet, ubi visione Dei
perfruentur perpetua.
|
|
