|
Sermonem intulit Abner ad seniores Israel, dicens: Tam heri quam
nudiusterius quaerebatis David ut regnaret super vos (II Reg. III).
Abner hortatur Israel universum ut, relicto Isboseth filio Saul, ad
David conveniant; quia sacerdotes sancti qui patris lucerna dicuntur,
lumine fidei et scientiae pleni, omnes gentes exhortantur ut, spreta
idolorum cultura et relicto errore confusionis cum auctore suo diabolo,
ad verum David, id est Christum, venire festinent. Nam et Joab, qui
Abner in dolo loquens et percutiens in inguine interfecit, hostem
significat antiquum, qui fideles fraudulenter subvertit, et per
libidinis contagionem interficit. Joab enim, inimicus vel idem pater
interpretatur. Omnium iniquorum diabolus pater est. Unde: Vos ex patre
diabolo estis (Joan. VIII), ab hac interfectione David immunis est; quia
Deus neminem tentat (Jac. I), qui omnes vult salvos fieri (Tim. II). Per
invidiam autem diaboli mors intravit in orbem terrarum (Sap. II) Potest
Joab nomine et persona figurare populum Judaeorum, qui semper fuerunt
inimici praedicatorum fidei et fidem Christi ubique persecuti sunt.
|
|
