|
Misit Joab nuntios ad David, dicens: Dimicavi adversus Rabath, capienda
est urbs aquarum. Nunc ergo congrega reliquam partem populi: et obside
civitatem, et cape eam, ne, cum a me vastata fuerit urbs, nomini meo
ascribatur victoria. Cumque dimicasset contra eam David, cepit eam, et
tulit diadema regis eorum de capite ejus (II Reg. XII). Haec victoria
David, quam Joab inchoavit et ipse perfecit, significat victoriam Regis
nostri. Dux enim contra hostes bellum gerit, cum praedicatorum ordo,
scutum fidei contra mundi potestates opponit. Sed victoria ad Christum
refertur, quia ipsi omnis potestas, et potentia regni ascribitur. Deus
enim est, qui operatur in nobis, et velle et perficere (Philipp. II).
Coronam regis hostilis populi David aufert et sibi diadema facit, cum
Christus diabolo regnum auferens, sibimet insigne decorum paravit. Quae
autem melius corona veri David intelligitur, quam conventus populi
catholici, qui caput nostrum regem, videlicet Christum, fide devota
nobiliter ambit, et digna conversatione decenter coronat. Omnis enim
sanctorum labor, et certamen, atque victoria ad honorem coelestis regis
refertur. Rabath est civitas regni Ammon, quae nunc Philadelphia
vocatur, et interpretatur multi. Et in Evangelio dicitur: Quod mutti ab
Oriente et Occidente venient, et recumbent cum Abraham, et Isaac, et
Jacob in regno coelorum (Matth. VIII).
|
|
