|
Philisthiim sunt daemones; Goliath, caput eorum, qui ante adventum
Domini superari non potuit; Geth, civitas Goliae, interpretatur
torcular. Hic est mundus et infernus, in quo velut obnoxios peccatis
conculcabat. Altitudo Goliae diaboli superbia, per quam supra filios
ejus obtinuit principatum, quasi palmam extollens. Arma Goliae, diaboli
sunt ad nocendum versutiae. David a patre ad visitandum fratres missus
est, et Christus a Patre Deo ad oves quae perierant domus Israel. David
ephi polentae, id est trium modiorum mensuram fratribus detulit, et
Christus mysterium sanctae Trinitatis credentibus commendavit. David
decem formellas casei tribuno detulit, et Christus Decalogum credentibus
tradidit.
|
|
