|
Convenerunt ad David qui erant in angustia constituti, et oppressi aere
alieno, et amaro animo; et factus est eorum princeps (I Reg. XXII).
David, id est Christus, princeps fit eorum qui oppressi sunt aere
alieno, id est censu peccatorum, quem diabolo persolvunt, dum exhibent
membra sua servire iniquitati ad iniquitatem (Rom. VI). Necesse est ut
amaro sint animo, ut in amaritudine animae poenitentiam gerant, et ad
David veniant, id est Christum cunctis desideratum, ut fiat eorum
princeps, quia ipse constitutus a Deo judex vivorum et mortuorum (Act.
X), princeps pacis (Isaia IX), cujus regni non erit finis (Luc. I).
|
|
