|
Abiit Elias, et sedit in torrente Carith, qui est contra Jordanem. Corvi
quoque deferebant ei panem et carnes mane et vespere, et bibebat de
torrente. Post dies autem aliquantos siccatus est torrens (III Reg.
XVII). Absconditus Elias noster Christus, in torrente Carith, qui
interpretatur calvus, de torrente bibit, cum in Calvariae loco ubi
abscondita est fortitudo ejus (Habac. III), de torrente mortalitatis
nostrae gustavit. Corvi pascebant Eliam deferentes ei panem, et carnes,
cum gentilitas de nigredine peccatorum veniens, Christo salutem nostram
esurienti; panem fide, et carnes, id est spem resurrectionis per gratiam
ejus illuminata offert. Mane scilicet, in initio praedicationis
evangelicae. Vespere, cum eamdem usque in finem mundi servans
incontaminatam, carnis resurrectio venienti judici praesentatur. Post
dies aliquot siccatus est torrens, quia consummato cursu praesentis
vitae, absorpta erit mors in victoriam, et jam non erit mors neque
luctus neque clamor, quia prima abierunt (Apoc. XXI).
|
|
