|
Dixit Elias ad Dominum: Altaria tua destruxerunt, et prophetas tuos
occiderunt gladio; et derelictus sum ego solus (I Reg. XIX). Tanto
prophetae quid difficile fuit agnoscere, in hoc mundo famulos remansisse
Deo? Sed qui humilis etiam occulta Dei noverat, elatus etiam aperta
nesciebat. Unde certum est quod humilitatis se radio illuminat, qui
aliorum bona sublimiter pensat; quia, dum ea quae ipse fecit facta foris
et ab aliis conspicit, eum, qui de singularitate intus erumpere nititur,
superbiae tumorem premit. Hinc est quod voce Dei, ad Eliam solum se
existimantem dicitur: Reliqui mihi septem millia virorum, quorum genua
non sunt incurvata ante Baal, ut se non solum remansisse cognosceret, et
elationis gloriam, quae de singularitate surgebat, abdicaret.
|
|
