|
Servi regis Syriae dixerunt ei: Dii montium sunt dii Israel; ideo
superaverunt nos. Sed melius est ut pugnemus contra eos in campestribus,
et obtinebimus eos (III Reg. XX). Diabolus, licet a sanctis saepius
vincatur, tamen iterum instaurat praelium contra eos, et dum uno modo
vincitur, alio modo statim vincere conatur. Diabolus namque et maligni
spiritus, si in spiritualibus vincuntur, in corporalibus bellum parant,
satagentes ut animas de supernis ad ima praecipitent, quo facilius
vincant. Si viderint coelestia desiderare, terrena ad amandum ingerunt;
si prosperitate concessa gratiae Dei agantur, student ut per adversa
frangantur. Sed, sicut Syri, ita daemones, ubi superare confidebant, ibi
prostrati sunt.
|
|
