|
Mulier Sunamitidis sancta est Ecclesia. Jacuit mulier Sunamitidis ad
pedes Elisei pro resuscitatione filii (IV Reg. IV), quia sancta Ecclesia
humiliter in patribus Dominum oravit pro redemptione humani generis.
Dominus autem, dum per Moysem legem dedit, quasi per puerum virgam
misit; sed per virgam, id est terrorem legis mortuum suscitare non
valuit, quia lex neminem ad perfectum ducit. Ipse superveniens super
cadaver sternitur quia, cum in forma Dei esset, semetipsum exinanivit,
formam servi accipiens (Philipp. II). Huc et illuc deambulat, quia et
gentes, et Judaeos ad aeternam beatitudinem per fidem vocat. Super
mortuum septies inspirat, quia per operationem divini muneris, gratiam
septiformis Spiritus, in peccati morte jacentibus aspirat. Moxque is,
quem virga suscitare non potuit, per amoris spiritum, puer ad vitam
redit.
|
|
