|
Vir quidam de Baalsalisa venit, deferens viro Dei panes primitiarum, et
viginti panes hordeaceos, et frumentum novum in pera sua. At ille dixit:
Da populo, ut comedat (IV Reg. IV). Vir iste coetus est Patrum. Qui de
Baalsalisa est, quia ternarium in confessione Trinitatis servat,
Baalsalisa enim habens tertium interpretatur. Hic vir viro Dei panes
primitiarum offert, cum Conditori gratia ejus inspiratus, offert libros
compositos de origine creaturarum. Offert frumentum novum in pera, cum
Novum Testamentum in Evangelii et apostolorum scriptis profert. Jubet
Eliseus noster ministro, id est praedicatoribus, ut hoc fidelibus
dispenset, et de thesauro proferat nova et vetera. Da, ait, populo, ut
comedat (Joan. VI). Haec enim dicit Dominus: Comedent, et supererit
(Matth. VIII). Quod mysterium legimus in fractione quinque et septem
panum, ubi satiatis turbis collegerunt duodecim cophinos, sive septem
sportas fragmentorum, quia nullus sacramenta Scripturae per omnia sic
capit, quin ipsi satiato supersit, juxta verbum Domini.
|
|
