|
Secutus est Giezi post tergum Naaman. Qui cum vidisset illum currentem
ad se, desilivit in occursum ejus de curru, et ait: Rectene sunt omnia?
Et ille: Dominus meus misit me, dicens: Modo venerunt ad me duo
adolescentes de monte Ephraim de filiis prophetarum; da eis talentum
argenti, et vestes mutatorias duplices (IV Reg. V). Illorum, qui
spiritualia dona, sacros scilicet ordines et bona Ecclesiae emunt vel
vendunt, duo reperiuntur auctores, unus in Veteri Testamento, et unus in
Novo. Giezi itaque in Veteri Testamento auctor probatur esse vendentium,
et Simon Magus in Novo Testamento dignoscitur esse auctor ementium,
quorum sequaces ab Ecclesia separantur, aeternis ignibus cruciandi.
|
|
