|
Dixit puer Elisei ad Jehu: Verbum mihi ad te, o princeps. Dixitque Jehu:
Ad quem ex omnibus nobis? At ille dixit: Ad te, o princeps. Et surrexit,
et ingressus est cubiculum. At ille fudit oleum super caput ejus, et
ait: Haec dicit Dominus Deus Israel: Unxi te regem super populum Dei
Israel, et percuties domum Achab domini tui, ut ulciscar sanguinem
prophetarum meorum, et sanguinem omnium servorum Domini de manu Jezabel
(IV Reg. VI). Jehu designat gentium principatum. Quem Dominus
destinavit, ut sacrilegam civitatem (quae prophetas, et Dominum
prophetarum occidit, et apostolos ejus persecuta est) ultione justa
perimeret, et sacerdotium (quod post Christum inaniter habuerat)
destrueret, templumque subverteret, et impiam Synagogam, quae sanguinem
sanctorum semper sitiebat, de regni culmine praecipitaret, et rectores
illius interficeret.
|
|
