|
In anno primo Cyri regis Persarum, ut compleretur verbum Domini ex ore
Jeremiae prophetae suscitavit Dominus spiritum Cyri regis Persarum, et
traduxit vocem in universo regno suo etiam per Scripturam, dicens: Haec
dicit Cyrus rex Persarum: Omnia regna terrae dedit mihi Dominus Deus
coeli, et ipse praecepit mihi ut aedificarem ei domum in Hierusalem,
quae est in Judaea. Quis est in nobis de universo populo ejus? Sit
Dominus Deus illius cum ipso. Ascendat in Hierusalem, quae est in
Judaea, et aedificet domum Domini Dei Israel (I Esdr. I) Sicut Cyrus,
destructo Chaldaeorum imperio, populum Dei liberavit et in patriam
remisit, et templum incensum Hierosolymis reaedificare praecepit, et hoc
etiam per litteras mandavit, ita Christus, destructo regno diaboli,
electos suos qui erant dispersi ab ejus tyrannide in Ecclesiam
congregavit, quae in praesenti justificata ex fide, pacem habet apud
Deum, et per ipsum ad visionem perpetuae pacis festinat. Hierusalem
quippe visio pacis dicitur. Templum quoque incensum restaurari fecit,
cum illos qui insidiis diaboli fidem perdiderant ad salutem reducens,
habitatione sua dignos efficit. Scripturas etiam sanctas per universum
mundum mittit, quibus fidem sui nominis, et spem salutis, cunctis, qui
ad regnum suum pertinent, id est electis praedicat. Domus vel templum
Dei in sacris Scripturis, unusquisque electorum, et tota Ecclesia solet
appellari, quia in cordibus in se credentium, et sperantium,
diligentiumque habitare consuevit. Unde scriptum est: Si quis diligit
me, sermones meos servabit, et Pater meus diligit eum, et ad eum
veniemus, et mansionem apud eum faciemus (Joan. XIV).
|
|
