|
Longum esset de singulis aedificiis, vel aedificationibus mystice
disserere, quae per se etiam peritus lector potest cognoscere: tamen hic
notandum quod qui portas et turres aedificant, per quas cives
ingrediantur, vel inimici arceantur prophetae sunt, et apostoli, et
evangelistae, per quos nobis forma fidei et rectae operationis, per quam
Ecclesiam intramus, ministratur; quorumque verbis adversarios veritatis
redarguere discimus. Qui vero reliqua urbis exstruunt, pastores sunt et
doctores, quos secundo loco posuit Apostolus, per quorum industriam
usque hodie, quasi per magnos architectos Ecclesiae, aedificata fides
catholica per totum orbem servatur: et sicut Nehemias ex ordine cunctos
civitatis structores enumerans perpetuae commendat memoriae, ita
consolator nostrae paupertatis Christus omnium, qui in electis Ecclesiam
aedificant, nomina scribit in coelo.
|
|
