|
Media pars juvenum faciebat opus, et media parata erat ad bellum (II
Esdr. IV). Aedificantium in muro, et portantium onera et imponentium,
una manu faciebat opus, et altera tenebat gladium. Aedificantium
unusquisque gladio erat accinctus renes, non non solum media pars
juvenum faciebat opus, et pars media parata erat ad bellum; sed juvenes,
qui faciebant opus, gladio erant accincti. Tanta erat versutia hostis
antiqui, tantus est furor malitiae ejus contra Ecclesiam, ut non solum
praedicatores veritatis, sed ipse populus Dei semper debeat contra
vigilare, et quasi acie stare. Aedificantes enim gladio accingunt renes,
cum ii qui bonis operibus insistere, et sibi commissos curant regulari
ratione disponere (hoc est enim vivos lapides in aedificio sanctae
Trinitatis competenter locare), fluxa luxuriae in se acumine verbi Dei
satagunt restringere.
|
|
