|
Populi terrae, qui important venalia, et ad usum omnia per diem Sabbati
ut vendant, non accipiemus ab eis in Sabbato (II Esdr. X). Nobis quoque
Sabbatum spirituale semper agendum est: semper a servili opere, id est a
peccato feriandum est; semper vacandum et videndum, quoniam ipse est
Deus (Psal. XXXIII), ut post tale Sabbatum liberati a conscientiae
peccatis, perveniamus ad Sabbatum futurae gloriae. Sed quaerunt populi
terrae profanare Sabbatum, venalia inferendo in die sanctificata, quando
immundi spiritus munditiam cordis maculare nituntur, et ingerere
illecebras vitiorum accepto pretio nostri consensus: quo diem maximae
sanctificationis inquinent, id est lucem piae actionis, vel cogitationis
erroribus obnubilent. Sed nos hujusmodi mercatum, clausis muris nostrae
urbis, id est custodia vitae perfectioris, prorsus vitare debemus.
|
|
