CAP. III. De numero vasorum, quae relata sunt de Babylone.

Hic est numerus vasorum, quae relata sunt de Babylone. Phialae aureae triginta. Phialae argenteae mille. Cultri viginti novem. Scyphi aurei triginta. Scyphi argentei secundi quadringenti decem (I Esdr. I), etc. Phialae vasa patula et lucida, sunt simplicium corda, qui nihil subdolae cogitationis habent, sed ea, quae in corde tenent, pura proferunt lingua. Cultri ad incidendos vel dividendos ratione congrua artus victimarum ut, omnibus ratione distinctis, pars in altari consumeretur, pars sacerdotibus, pars levitis, pars offerentibus daretur, illos significant qui discretionem habent, qui perfecte norunt de sacrificio salutari discernere, quod est Christus: quae omnibus sint dicenda, quae perfectioribus, quae humanae conditionis modum excedentia igni Spiritus sancti tribuenda. Scyphi aurei, sunt qui majori sapientiae splendore rutilant; argentei, qui docendi venustate nitidi, quae norunt planius exponunt.