CAP. IV. De numero revertentium de Babylone.

Numeratus est populus secundum generationem suam, qui reversus est de Babylone (I Esdr. II). Ideo vigilanter Scriptura distinxit de qua generatione captivorum soluti in patriam redierunt, ut ex eo admoneremur quanta certitudine Dominus summam electorum suorum in libro vitae conscribat, et velut in alio coeli consignet, quot animas quisque fidelium, vel verbo, vel exemplo converterit, pro quibus certa mercede remuneret.