|
Equi eorum sexcenti triginta sex. Muli eorum ducenti quadraginta
quinque. Cameli eorum quadringenti triginta quinque. Asini eorum sex
millia septingenti viginti (I Esdr. II). Inter homines, qui de
captivitate ascenderunt, etiam animalia quibus adjuvabantur,
describuntur, et eorum sicut numerus hominum designatur; quia sunt multi
in Ecclesia, vel sensu tardiores, vel minus spirituales, qui, cum
magistris spiritualibus devote obtemperant, et ad portanda onera
fraternae necessitatis, dorsum mentis inclinant, cum caeteris electis de
confusione diabolicae captivitatis erepti, ad supernae civitatis moenia
tendunt, quorum numerus nunc in memoria Dei jugiter conservatur. Unde:
Imperfectum meum viderunt oculi tui, et in libro tuo omnes scribentur
(Psal. CXXXVIII). Et alibi: Homines et jumenta salvabis, Domine (Psal.
XXXV).
|
|
