CAP. VIII. De roboratione arboris sapientiae per charitatem.

Octavo loco adjunctum est: per charitatem roboratur. Charitas similis est vino. Vinum namque eos, quos inebriaverit reddit hilares, audaces, fortes, obliviosos, et quodammodo insensibiles. Sic charitas mundando conscientiam mentem exhilarat, deinde audacem reddit, quando per munditiam conscientiae, fiduciam praestat. Deinde vires auget, quia, sicut testatur Scriptura, fortis est ut leo qui confidit in Domino (Prov. XXVIII). Conscientia enim munda nullis adversis superari potest, quia cum intus de Dei semper adjutorio confidit, quidquid adversi foris tolerat facile contemnit, et vincit. Oblivionem quoque generat, quia, dum totam animi intentionem ad desideria aeternorum trahit, omnium quae transeunt memoriam ab animo funditus evellit. Insensibilem reddit, quia dum mentem per internam dulcedinem medullitus replet, quidquid exterius amarum infertur contemnit, quasi non sentiatur. Charitas ergo sapientiam roborat, dum menti et fiduciam, et fortitudinem, et insuperabilem quodammodo insensibilem reddendo constantiam praestat. Possumus si volumus in his octo gradibus octo beatitudines per ordinem expressas notare, ita ut id quod dictum est, per timorem seminatur, pertineat ad id quod dicitur. Beati pauperes spiritu, quoniam ipsorum est regnum coelorum (Matth. V). Id quod dictum est, per gratiam rigatur, pertineat ad id quod dicitur: Beati mites, quoniam ipsi possidebunt terram (ibid.). Id quod dicitur, per dolorem moritur, pertineat ad id quod dicitur: Beati qui lugent, quoniam ipsi consolabuntur (ibid.). Id quod dictum est, per fidem radicat, pertineat ad id quod dicitur. Beati qui esuriunt, et sitiunt justitiam, quoniam ipsi saturabuntur (ibid.). Id quod dictum est, per devotionem germinat, pertineat ad id quod dicitur: Beati misericordes, quoniam ipsi misericordiam consequentur (ibid.). Id quod dicitur, per compunctionem oritur, pertineat ad id quod dicitur: Beati mundo corde quoniam ipsi Deum videbunt (ibid.). Id quod dictum est, per desiderium crescit, pertineat ad id quod dicitur: Beati pacifici, quoniam filii Dei vocabuntur (ibid.). Id quod dictum est per charitatem roboratur, pertineat ad id quod dicitur: Beati qui persecutionem patiuntur propter justitiam, quoniam ipsorum est regnum coelorum (ibid.).