Auctor incertus

DE ANIMA ET EJUS AD SUI ET AD DEI COGNITIONEM
ET AD VERAM PIETATEM INSTITUTIONE LIBRI QUATUOR

Quorum primus et tertius ob summum in eis rutilantem piae
devotionis affectum sub Meditationum et De interiori domo
titulis devoto doctori beato Bernardo Claraevallensi
ascripti sunt. Secundum vero tum propter disserendi
subtilitatem, tum propter dicendi gravitatem, beati
Augustini opera sibi perperam vindicarunt, nam in eo
citatur Boetius praeter Augustini rationem et contra
tempora.

LIBER PRIMUS

MEDITATIONES PIISSIMAE
DE COGNITIONE HUMANAE CONDITIONIS.

Exstat inter Opera S. Bernardi,
Patrologiae tomo CLXXXIV, col. 485.


NOTA.

In omnibus fere manuscriptis Bernardo tribuuntur, et quidem saepe,

“De interiori homine,”

inscriptae. Exstant nihilominus apud Hugonem Victorinum sub titulo

“libri quarti de Anima:”

quanquam nec illius esse videantur. In codice Dunensi hanc praeferunt epigraphen:

“Tractatus utilis ex verbis B. Bernardi abbatis Clarae-Vallensis et aliorum Patrum, de Interiori homine, quomodo Deum inveniat.”

Certe aliquoties Ambrosii, Augustini, et Boetii sententiae, nedum Senecae, referuntur in his Meditationibus: quae non semel sub nomine Bernardi laudantur in Bernardino, seu in pervetusto libro Florum ex Bernardo, nempe in lib. 5, capp. 10, 11, 13, 17, 44, 48; tametsi pauca ex vulgatis Bernardi operibus in his Meditationibus afferuntur: quae Bernardo nec indignae sunt, nec tamen ejus esse nobis videntur, cum ob styli dissimilitudinem, tum ob carminum citationes, Bernardo insolitas; ne quid dicamus de illa peccatorum confessione, quae fit a cap. 9, longe alia ab ea quae est apud Bernardum in tractatu De gradibus humilitatis, cap. 18.