|
Opus hoc, quemadmodum Erasmus probe judicavit, hominis est variae
multaeque lectionis, in quo non aliquid artis videas aut ingenii, sed
quasi arenam sine calce, dicta tantum et collectanea ex diversis locis
exscripta: ex Augustino scilicet, ex Gennadio, Boethio, Cassiodoro,
Isidoro Hispalensi, Beda, Alcuino, Hugone Victorino, Bernardo, Isaaco
Stellensi abbate, etc. Joannes Trithemius abbas recenset hunc librum in
catalogo lucubrationum Hugonis a sancto Victore. Sub ejusdem nomine
citat Vincentius Bello vacensis in Speculo Naturali, lib. 23 et 25
passim, ac lib. 24, cap. 1, lib. 27, cap. 73. Praeterea in Speculo
Historiali, lib. 18, cap. 55, ubi opusculum istud stilum Augustini, cui
a nonnullis tribuebatur, minime sapere observavit, videri sibi ait ex
ejusdem libris excerptum, auctore, uti ferebatur, magistro Hugone
Victorino. Inter opuscula demum Hugonis vulgata exhibetur, estque ibi
liber de Anima secundus, ipsius nomine in Victorino Ms. praenotatus.
Attamen excerpta quae in eo plurima ex ipsius Hugonis libris occurrunt
cum insigni sententiarum mutatione, auctorem operis quaerere alium
cogunt. Thomas Aquinas in quaest. unica de Anima, art. 12, ad 1, anonymo
cuidam Cisterciensis ordinis illud adscribit. Hunc nos Alcherum esse
suspicamur, cui familiari suo Isaac abbas Stellensis e Cisterciensi
familia epistolam de Anima scripsit, rogatus nimirum ab Alchero, qui
ipsum de hoc argumento disputantem in collatione audierat, ut se aliquid
amplius de animae essentia, et viribus edoceret. Enim vero in
bibliothecae Cisterciensis tomo 6, post praedictam epistolam proxime
subjungitur liber iste de Spiritu et Anima cum hac inscriptione excusus:
|
“Ejusdem B. Isaac abbatis de Stella, seu ut ipsi inscribere placuit,
Alcheri de Anima liber.”
|
|
Hujus nempe inscriptionis pars posterior vera, prior falsa merito
videbitur: praesertim quia Epistola abbatis Isaac maximam partem libro
huic a collectore inserta est. Alcherus porro Clarevallensis monachus
apud Possevinum, in Isaac, fuisse legitur; vir discendi studiosus et in
physica eminens, teste Isaaco in praedicta ad Alcherum epistola. Opus
contulimus cum Mss. Romanis bibliothecae Vaticanae quatuor, cum uno ex
abbatia S. Medardi Suessionensi, cum Victorino, Sorbonico et aliis.
|
|
