|
In ea siquidem coelesti patria est vita sine morte, juventus sine
senectute, sanitas sine infirmitate, requies sine labore, gaudium sine
tristitia, pax sine discordia delectatio sine fastidio, lux sine
tenebris, pulchritudo sine turpitudine, agilitas sine ponderositate,
fortitudo sine imbecillitate, libertas sine servitute, voluptas sine
anxietate, longaevitas sine vitae termino, sapientia sine insipientia,
amicitia sine inimicitia, concordia sine discordia, honor sine dedecore,
securitas sine timore.
Charitas est motus animi rationalis ad diligendum seipsum propter Deum,
amicum in Deo, inimicum propter Deum. Humilitas est contemptus saeculi,
et abjectio sui. Obedientia est vicaria servitus. Disciplina est
necessarium sanctitatis officium, vitia arguentis, et peccata
corrigentis. Item disciplina est ordinata morum correctio, majorumque
antecessorum regularis observatio; ex hac nascitur clementia. Clementia
est benignitas superioris erga inferiores. Ex qua rursus generatur
justificatio. Justificatio est rei perfectae consummatio. Castitas est
munditia corporis cum integritate mentis. Perseverantia est exitus rei
per consummationem fidei. Charitas est virtutum radix; humilitas,
bonorum servatrix; obedientia; praeceptorum incitatrix; disciplina,
vitiorum emendatrix; castitas, monachorum adornatrix; perseverantia,
bonorum omnium coronatrix.
|
|
