|
Tu coelum et terram imples omnia portans sine onere, omnia implens sine
inclusione. Semper agens, semper quietus, colligens non egens, quaerens
cum nihil tibi desit. Amas nec aestuas, zelas et securus es. Poenitet
te, et non doles. Irasceris et tranquillus es. Opera mutas, sed non
mutas consilium. Recipis quod invenis, et nunquam amisisti. Nunquam
inops, et gaudens lucris. Nunquam avarus et usuras exigens. Semper
erogatur tibi, ut debeas, et quis habet quidquam non tuum? Reddis debita
nulli debens, donas debita nihil perdens. Qui ubique es, et ubique
totus, qui sentiri potes, et videri non potes. Qui nusquam dees, et
tamen ab iniquorum cogitationibus longe es. Qui nec ubi dees inde longe
es, quia ubi non es per gratiam, ades per vindictam. Qui ubique praesens
es, et vix inveniri potes. Quem stantem sequimur, et apprehendere non
valemus. Qui tenes omnia, imples omnia, circumplecteris omnia super
excedis omnia, sustines omnia. Qui corda fidelium doces sine strepitu
verborum. Qui locis non distenderis, nec temporibus variaris, neque
habes accessus et recessus. Qui habitas lucem inaccessibilem, quam vidit
nullus hominum, nec videre potest. In te manens quietus ubique circuis
totum. Non enim scindi vel dividi poteris, quia vere unus es. Nec in
partes effunderis, sed totus totum tenes, totum illustras et possides.
Si totum mundum libri repleant, tua scientia inenarrabilis non potest
enarrari. Quoniam vero indicibilis es, nullo modo scribi poteris, neque
concludi. Tu es fons lucis divinae et sol claritatis aeternae. Magnus
enim es sine quantitate, et ideo immensus. Bonus sine qualitate, ideo
vere et summe bonus, et nemo bonus, nisi tu solus. Cujus voluntas opus
est, cui velle posse est, qui omnia, quae ex nihilo creasti, sola
voluntate fecisti. Qui omnem creaturam tuam absque indigentia aliqua
possides, et sine labore gubernas, et absque taedio regis. Et nihil est
quod conturbet ordinem imperii tui vel in summis vel in imis. Qui in
omnibus locis sine loco haberis, et omnia contines sine habitu, et
ubique praesens es sine situ et motu. Qui nec mali actor es, quod facere
non potes. Nec unquam te quidquam fecisse poenituit, cujus bonitate
facti sumus, et justitia poenas luimus, et clementia liberamur. Cujus
omnipotentia omnia gubernat, regit, et implet quod creavit. Nec ideo te
implere omnia dicimus, ut te contineant, sed ut ipsa potius a te
contineantur. Nec particulatim imples omnia. Nec ullatenus ita putandum
est, ut unaquaeque res pro magnitudine suae portionis capiat te, id est
maxima majus, minima minus. Dum sis potius ipse in omnibus, sive omnia
in te. Cujus omnipotentia omnia concludit, nec evadendi potentiam tuam
quis aditum invenire poterit. Qui enim te non habet placatum, nequaquam
evadet iratum.
|
|
