|
Si dormiatis inter medios cleros, pennae columbae deargentatae et
posteriora dorsi ejus in pallore auri (Psal. LXVII). In sacra Scriptura,
frater, tres columbas legendo reperi, ex quibus, si attente
considerentur, simplicium mentes ad perfectionem poterunt edoceri,
columbam scilicet Noe, columbam David, columbam Jesu Christi. Noe
requies, David manu fortis, Jesus Salvator interpretatur. Peccatori
autem dicitur: Peccasti (Eccli. XXI), quiesce. Si igitur vis esse Noe,
quiesce a peccatis. Ut David esse possis, operare fortia. Si salvari
desideras, a Salvatore salutem postula. Diverte igitur a malo, et fac
bonum, inquire pacem (Psal. XXXIII). Diverte ad arcam Noe. Praeliare cum
David praelia Domini. Inquire pacem cum Jesu in Jerusalem. Diverte ad
quietem mentis, resiste tentationibus, exspecta patienter salutis
beneficium. De columba vero Noe dicitur: Reversa est columba ad vesperam
ferens in ore ramum virentis olivae (Gen. VIII). Ad arcam Noe columba
revertitur, cum ad quietem mentis ab exterioribus animus revocatur.
Revertitur ad vesperam, cum deficiente luce mundanae felicitatis, vanae
gloriae fugit pompam, timens ne incurrat obscuritatem mentis, id est
profunditatem perpetuae damnationis. Olivam gerit, quia misericordiam
quaerit. Olivam in ore portat, dum indulgere sibi quod deliquit precibus
exorat. De columba vero David dicitur. Et posteriora dorsi ejus in
pallore auri. In posterioribus dorsi aurum habetur, quia bene operanti,
in futuro venia promittitur. Similiter et de Salvatore legitur quod in
descensu columbae super eum haec vox audiretur: Hic est Filius meus
dilectus, in quo mihi bene complacui. (Matth. III). Columba est Spiritus
sancti gratia, quae super Jesum in Jordane descendisse cernitur, quia
cuilibet humili a peccatis mundato gratia praeparatur. Poenitenti igitur
fit misericordia, operanti promittitur venia, diligenti datur gratia.
|
|
