|
Color reliqui corporis imitatur colorem turbati maris. Mare motu
fluctuum saeviens ebullit. Caro motu sensuum ebulliens saevit. Mare
perturbationibus suis arenas movet et sublevat. Caro delectationibus
suis animi levitatem pulsat. Mare terminos suos egrediens aquis dulcibus
occurrit. Caro lasciviens lacrymarum dulces rivulos obtundit. Mare
diversis procellarum turbinibus navigantium cursus impedit. Caro
procellosa recte viventium mores in profundum mergit. Dum tantis mare
tempestatibus agitatur, undarum collisione terra fluctibus immiscetur,
et sic ex collisione maris et terrae, colorem mistum recipit mare.
Similiter dum caro suggerit et animus non consentit, quasi ex nigro et
niveo quidam in corpore color efficitur, qui ex diversis factus color
medius appellatur. Marinus igitur color in pectore columhae
tribulationem designat in humana mente.
|
|
