|
In diversis locis diversas columbae proprietates reperi, quas inserens
huic operi, tibi, frater, annotare curavi. Prima vero columbae
proprietas est quod pro cantu gemitum profert; secunda, quod felle
caret; tertia, quod osculis instat; quarta, quod gregatim volat; quinta,
quod ex raptu non vivit; sexta, quod grana meliora colligit; septima,
quod non vescitur cadavere; octava, quod nidificat in petrae
foraminibus; nona, quod super fluenta aquarum residet, ut, visa
accipitris umbra, venientem citius devitet; decima, quod geminos nutrit
pullos. Columba pro cantu utitur gemitu, quia quod libens fecit,
plangendo gemit. Caret felle, id est irascibilitatis amaritudine. Instat
osculis, quia delectatur in multitudine pacis. Gregatim volat, quia
conventus amat. Non vivit ex raptu, quia non detrahit proximo. Colligit
grana meliora, id est meliora dicta. Non vescitur cadaveribus, id est
desideriis carnalibus. Nidificat in foraminibus petrae, quia spem ponit
in Christi passione. Super fluenta aquarum residet, ut, visa accipitris
umbra, venientem citius devitet, quia in Scripturis studet ut
supervenientis diaboli fraudem declinet. Geminos nutrit pullos, id est
amorem Dei et amorem proximi. Qui igitur has naturas habet, assumat sibi
contemplationis alas, quibus ad coelum volet.
|
|
