|
Duae sunt species accipitrum, domesticus scilicet et silvester, iidem
tamen sunt. Sed diversis temporibus potest esse silvester et domesticus.
Silvester rapere consuevit domesticas volucres, et domesticus
silvestres. Silvester quas rapit continuo devorat, domesticus captas
domino suo relinquendas servat. Porro dominus ejus captarum volucrum
ventres aperit, et eorum corda accipitri in cibum tribuenda sumit.
Interiora ventris cum fimo ejicit, qui intus remanens putredinem carnium
cum fetore gignit. Moraliter: silvester accipiter captas volucres et
rapit et devorat, quia quilibet perversus actus et cogitationes
simplicium dissipare non cessat. Domesticus vero accipiter est
spiritualis pater, qui toties silvestres volucres rapit, quoties
saeculares ad conversionem praedicando trahit. Captas occidit, dum
saeculares mundo mori per carnis mortificationem cogit. Dominus autem
ejus et omnipotens Deus ventres earum aperit, quando mollitiem carnalium
per Scripturas increpando solvit. Corda vero extrahit, dum cogitationes
saecularium per confessionem manifestas facit. Interiora ventris cum
fimo ejicit, quando memoriam peccanti fetentem reddit. Ad mensam itaque
Domini captae volucres veniunt, dum in corpus Ecclesiae peccatores
doctorum dentibus masticati sese convertunt.
|
|
