CAP. XIX. De loro seu corrigia, et ligamine accipitris.

Corrigia, per quam accipiter ligatur in pertica, est mortificatio carnis, per quam quilibet conversus tenetur in regulari vita. Corrigia siquidem, quae fit de corio mortui animalis, designat mortificationem carnis. Non rumpitur haec corrigia, sed solvitur, cum ad capiendum aliquid accipiter impellitur. Similiter si quilibet frater ad aliquid temporale exeat, non rumpitur propositum, sed cum revertitur, eadem corrigia, qua prius, seipsum firmius ligat.