|
Si dormiatis inter medios cleros, pennae columbae deargentatae, et
posteriora dorsi eius in pallore auri (Psal. LXVII). Columba deargentata
est Ecclesia, doctrina divini eloquii erudita, quae per similitudinem
fertur habere praedicationis rostrum ratione divisum, quo grana
congregat hordei et frumenti, sententias scilicet Veteris et Novi
Testamenti. Habet dextrum et sinistrum oculum, moralem et mysticum
sensum: seipsam respicit sinistro, Deum vero contemplatur dextro. Duas
alas habet, activam et contemplativam vitam; his duabus alis sedens
tegitur; his duabus volans ad coelestia sublevatur. Volamus, cum mente
excedimus. Sedemus, cum inter fratres sobrii sumus. In his siquidem alis
pennae sunt. Pennae vero sunt doctores, alis rectae actionis et divinae
contemplationis inhaerentes. Cleros vero [Graece], sortes vocamus
Latine. Duae sortes, duo sunt Testamenta. Inter quas sortes dormiunt,
qui auctoritatibus Veteris et Novi Testamenti concordant et acquiescunt.
Et posteriora dorsi ejus in pallore auri. Dorsum columbae illam partem
corporis esse dicunt, cui radices alarum sese invicem naturaliter
conjungunt. Ibidem cor ponitur, quod dorso proximum, auro perpetuae
beatitudinis in futuro operietur. Sicut aurum pretiosius est argento,
sic et beatitudo futuri saeculi pretiosior est felicitati praesente.
Posteriora igitur dorsi columbae in pallore auri erunt, quia justi in
aeterna beatitudine nimia claritate fulgebunt.
|
|
