|
Anima nostra sicut passer erepta est de laqueo venantium. Laqueus
contritus est, et nos liberati sumus (Psal. CXXIII). Tenet anima
similitudinem passeris, dum in his quae agit utitur exemplo
calliditatis. Dum enim anima saepius seipsam considerat, contingit
quandoque ut ex usu assiduae considerationis animus callidior fiat, ut
in via positum vitet laqueum. Sunt autem tres laquei venantium. Primus
laqueus est fallax suggestio daemonum; secundus, subtilis deceptio
haereticorum; tertius, dulcedo vitae carnalium. Hi laquei ponuntur in
semita, in via, in campo. Semita est arctior vita; via est lata vita;
campus, spatiosa. Per arctam et arduam religiosi, per latam et rectam
conjugati, per spatiosam et deviam voluptuosi gradiuntur. Laqueus
passerem captum retinet, dum diabolus mentem possidet, vel dum dulcedo
vitae praesentis placet, seu dum haereticus blanditiis deceptum fovet.
Sed laqueus rumpitur, et passer liberatur, si, abjectis carnalibus
desideriis, anima ad Deum convertatur; hoc autem non fit per nostram
potentiam, sed per gratiam. Adjutorium enim nostrum in nomine Domini
(Psal. CXXIII).
|
|
