CAP. XXXIV. De nycticorace, id est noctua.

Factus sum sicut nycticorax in domicilio (Psal. CI). Nycticorax est avis, quae amat tenebras noctis. In parietinis habitat, quia in ruinis maceriarum, quae sunt sine tecto, domicilium servat. Lucem refugit, In nocte volitans cibos quaerit. Mystice nycticorax Christum significat, qui noctis tenebras amat, quia non vult mortem peccatoris, sed ut convertatur et vivat (Ezech. XVIII). Ita enim Deus dilexit mundum, ut pro redemptiene mundi morti traderet Filium suum (Joan. III). Quod autem peccatores tenebrae vocentur, Apostolos testatur, dicens: Fuistis aliquando tenebrae, nunc autem lux in Domino (Ephes. V). Habitat nycticorax in ruinis parietum, quia Christus nasci voluit de populo Judaeorum. Non sum, inquit, missus nisi ad oves quae perierunt domus Israel (Matth. XV). Sed Christus opprimitur a ruinis, quia occiditur a Judaeis. Lucem refugit, quia vanam gloriam detestatur et odit. Cum enim leprosum curaret, ut nobis exemplum humilitatis daret, dixit leproso: Vide, nemini, dixeris (Matth. VIII). De hac luce dicitur: Auferetur ab impiis lux sua (Job XXXVIII), id est, praesentis vitae gaudia. Ipse autem est lux inaccessibilis, quae illuminat omnem hominem venientem in hunc mundum (Joan. I). Lux igitur refugit lucem, id est veritas refugit mundanae gloriae vanitatem. In nocte volitans escas quaerit, quia peccatores in corpus Ecclesiae praedicando convertit. Moraliter autem nycticorax non quemlibet justum innuit nobis, sed eum qui, inter homines degens, ab intuitu hominum se, in quantum potest, abscondit. Lucem refugit, quia humanae laudis gloriam non attendit; de qua luce dicitur: Nonne lux impii exstinguetur, nec splendebit flamma ignis ejus? (Job XVIII.) Lucem dicit praesentis vitae prosperitatem. Sed lux impii exstinguitur, quia futurae vitae prosperitas cum ipsa terminatur. Nec splendebit flamma ignis ejus. Ignem dicit temporalium desideriorum fervorem. Flamma est decor, vel potestas exterior, quae de interno ejus ardore procedit. Sed non splendebit, quia in die exitus omnis exterior decor, et potestas peribit. In nocte vigilat, dum peccatorum tenebras attendens, eorum errores vitat. Habitat in ruinis parietum, dum mundi defectum considerat, et exspectat occasum. Escam in nocte quaerit, quia peccantium vitam recogitans, de exemplis justorum mentem, et vitam pascit.