|
Ciconiae vocatae sunt a sono quo crepitant ciconiae, quem sonum oris
potius esse constat quam vocis, quia cum quatiente rostro faciunt. Hae
veris nuntiae, societatis comites, serpentium hostes, maria transvolant,
in Asiam collecto agmine pergunt. Cornices duces eas praecedunt, et
ipsae quasi exercitus prosequuntur. Eximia illis circa filios pietas.
Nam usque adeo nidos impense fovent, ut assiduo incubitu plumas exuant.
Quantum autem tempus impenderint in fetibus educandis, tantum et ipsae
invicem a pullis suis aluntur. Ciconiae sonum oris pro voce quatiente
rostro faciunt. Illos autem praetendunt qui cum fletu et stridore
dentium quod male gesserunt ore promunt. Hae sunt nuntiae veris, quia
caeteris demonstrant temperantiam conversae mentis. Societatis sunt
comites, quia libenter habitant inter fratres. Dicitur etiam de ciconia
quod sit serpentibus inimica. Serpentes sunt perversae cogitationes,
sive perversi fratres, quos ciconia rostro percutit, dum justus pravas
cogitationes restringit, vel perversos fratres pungenti invectione
reprehendit. Maria transvolantes, in Asiam collecto agmine pergunt. Asia
interpretatur elevata. Maria igitur transvolant, et in Asiam pergunt qui
spretis mundi tumultibus ad altiora tendunt. Eximia illis circa filios
pietas, ut assiduo incubitu super eos plumas exuant. Assiduo incubitu
super pullos ciconiae plumas exuunt, quia dum praelati subjectos
nutriunt, superfluitatis et levitatis a se plumas evellunt. Quantum
autem tempus impenderint in fetibus educandis, tantum et ipsae invicem a
pullis aluntur. Quandiu pulli earum indigent, tandiu ciconiae eos
nutrire debent, quia, quandiu erudiri indigent discipuli, tandiu verbo
doctrinae debent eos alere praelati. Similiter subjecti praelatos suis
laboribus fovere debent, ut eis ministrent necessaria quibus indigent.
Turtur igitur, et ciconia, et hirundo illos reprehendunt qui Christum in
carnem advenisse non credunt, et judicium Domini futurum non
pertimescunt.
|
|
