|
De qua columba hic agitur, rubros pedes habere perhibetur. Haec columba
est Ecclesia, quae pedes habuit, quibus totius mundi spatium
perambulavit. Pedes sunt martyres, qui tot passibus terram perambulant
quot bonorum operum exemplis viam justitiae sequentibus se demonstrant.
Terram tangunt, cum dignis increpationibus actus et voluntates terrenas
reprehendunt. Sed, dum terra premitur, asperitate terrae, id est
terrenorum crudelitate, pedes vulnerantur, et sic pedes Ecclesiae rubri
facti sunt, quia sanguinem suum pro Christi nomine martyres effuderunt.
Rubor igitur pedum est cruor martyrum.
|
|
