|
Olor avis est, quam Graeci [k][uac][k][n][o][n] cygnum appellant. Olor
autem dictus est quia [rboac][l][o][sf] [olos] dicitur totus, quod sit
totus albus in plumis. Nullus enim meminit cygnum vidisse nigrum. Cygnus
autem a canendo est appellatus, eo quod carminis dulcedinem modulatis
vocibus fundit. Ideo autem suaviter eum canere perhibent, quia longum
collum et inflexum habet, et necesse est eluctantem vocem per longum et
flexuosum iter varias reddere modulationes. Ferunt in Hyperboreis
partibus praecinentibus citharoedis olores plurimos advolare, apteque
admodum concinere. Cygnus plumam habet niveam, sed carnem nigram.
Moraliter olor niveus in plumis designat effectum simulationis, qua caro
nigra tegitur, quia peccatum carnis simulatione velatur. Cygnus, dum in
flumine natat, cervicem capitis erectam gestat, quia superbus qui cum
rebus transitoriis ad interitum trahitur, etiam de labentium rerum
possessione ad tempus gloriatur. Ferunt in hyperboreis partibus
praecinentibus citharoedis olores plurimos advolare, apteque admodum
concinere, quia qui voluptatibus totis desideriis inhiant, quasi
advolantes voluptuosis concordant. Sed et in extremis cum cygnus moritur
valde dulciter canero perhibetur. Similiter cum de hac vita superbus
egreditur, adhuc dulcedine praesentis saeculi delectatur, et quae male
gessit, ad memoriam moriens reducit. Cum vero nivea pluma cygnus
exuitur, in veru positus ad ignem torretur. Similiter cum dives superbus
moriens exuitur mundana gloria, descendens ad flammas inferni
cruciabitur per tormenta, et qui cibum sumere consueverat nimis, in
abyssum descendens fit cibus ignis.
|
|
