|
Est volatile quod dicitur ibis, hoc secundum legem immundum est prae
omnibus volatilibus, quoniam mortuis et morticinis cadaveribus vescitur,
et super littora maris vel fluminum, vel stagnorum die nocteque moratur,
quaerens mortuos pisciculos, vel aliquod cadaver, quod ab aqua jam
putridum vel madidum ejectum fuerit foras. Nam in aquam ingredi timet,
quia natare nescit, nec dat operam ut discat, quia mortuis cadaveribus
delectatur, ideo non potest in altitudinem aquae ingredi, ubi mundi
pisciculi demorantur, ut inde sibi capiat cibum, sed semper foris
oberrans circuit refugiens puriores et altissimas aquas, unde possit
mundus vivere. Tu igitur, Christiane homo, qui ex aqua et Spiritu sancto
renatus es, ingredere ad intelligibiles et spirituales aquas, id est in
altitudinem praeceptorum Christi, quae sunt charitas, gaudium, pax,
patientia, benignitas, longanimitas, bonitas, mansuetudo, fides,
modestia, continentia, castitas (Galat. V). Quia, si nolueris in
altiores ingredi, et de ipsis spiritualibus escas tibi capere et sumere,
sed circumiens foris et oberrans mortuis, et foedissimis cadaveribus
saginari volueris, de quibus dicit Apostolus: Manifesta autem sunt opera
carnis, quae sunt immunditia, adulteria, fornicatio, impudicitia,
luxuria, ebrietas, commessatio, avaritia, cupiditas (ibid.), ad
immundorum societatem pervenies. Hae sunt carnales et mortiferae escae,
quibus infelices animae nutriuntur ad poenam. Disce igitur natare super
hoc mare magnum, et spatiosum manibus, sunt illic reptilia quorum non
est numerus (Psal. CIII). Nec eos aliter superabis, nisi per signum
crucis. Sancti igitur tanquam naves pertranseuntes perveniunt ad regna
coelorum, velut quietissimum portum. Nescientes autem spiritualiter
natare excludentur a regno coelorum, et mortui cum mortuis peribunt,
sicut dicitur in Evangelio: Dimitte mortuos sepelire mortuos (Matth.
VIII). Convenienter ergo hoc de ibi physiologus dicit et quod serpentes
violenter fugat. Et tu, cum oras, extende manus tuas ad coelos, quia
virtus crucis semper defendit orantes et dicentes: Signatum est super
nos lumen vultus tui, Domine (Psal. IV). Nam et sol ipse, nisi
extenderit radios suos, non lucet, et volucres, nisi expanderint alas
suas, volare non possunt. Naves nisi levaverint vela sua, vento flante
non movebuntur. Denique dum Moyses levabat manus suas, superabat Israel,
cum remitteret manus suas, convalescebat Amalech (Exod. XVII).
|
|
