|
Est volatile, quod dicitur fulica, satis intelligibile et prudentissimum
super omnia volatilia. Cadaveribus non vescitur, non aliunde alio
pervolans atque oberrans, sed in uno loco commoratur et permanet usque
ad finem, et ibi escam suam habet, et requiescit. Sic ergo omnis homo
fidelis secundum Dei voluntatem conservatur et vivit. Non huc atque
illuc per diversa loca oberrans circumvolat, sicut faciunt haeretici.
Nec saecularibus desideriis ac voluptatibus delectatur corporalibus, sed
sicut illa volucris, quae carnibus non vescitur, semper in uno eodemque
se continet et requiescit loco, id est in Ecclesia catholica et
apostolica, et ibi permanet usque in finem, sicut dicitur in Evangelio:
Qui autem perseveraverit usque in finem, hic salvus erit (Matth. X). Ibi
ergo se continet, et ibi Dominus inhabitare facit unanimes in domo, et
ibi habet quotidianum panem immortalitatis, potum vero pretiosum
sanguinem Christi, reficiens se sanctis epulis, et super mel et favum
suavissimis eloquiis Domini. Non enim in solo pane vivit homo, sed ex
omni verbo Dei (Matth. IV). Fulica avis est stagnensis, habens nidum in
medio aquae, vel in petris quas aqua circumdat, maritimoque semper
delectatur profundo, dum tempestatem praesenserit, fugiens in nido
ludit.
|
|
