|
Est animal quod dicitur castor vel fiber, nimis acri ingenio, et nimis
mansuetum animal, cujus testiculi in medicina proficiunt ad diversas
valetudines, morbosque varios curandos. Physiologus naturam ejus
exprimens refert quod, cum investigatus fuerit, et insecutus, ac
acerrime timens capi a venatoribus, respicit ad eos, morsuque suos
testiculos abscindit, et ante eos projicit fugiens, venatorque veniens
colligit illos, et ultra non sequitur eum, sed revertitur. Si autem
evenerit ut alter venator eum inveniat, cum viderit se non posse
evadere, erigit se, demonstrans venatori sua virilia evulsa. Venator
vero hoc videns discedit ab eo. Sic et ille, qui secundum mandatum Dei
vult vivere caste abscindit a se omnia vitia, et omnes impudicos actus
abjicit in faciem diaboli. Tunc diabolus videns eum sine testiculis
vitiorum, confusus discedit ab eo. Sic sine dubio omnes, qui volunt
caste vivere, oportet ut resecent omnia vitia cordis et corporis a se,
et projiciant in faciem diaboli, et vivant in Christo. Nihil ergo
commune habeat homo Dei cum diabolo, ut tutus dicere cum Domino valeat:
Venit princeps mundi hujus, et in me non habet quidquam (Joan. XIV).
Unde dicit Apostolus. Reddite omnibus debita, cui tributum, tributum;
cui vectigal, vectigal; cui honorem, honorem (Rom. XIII). In primis
reddamus diabolo quae sunt ejus, renuntiantes illi et omnibus operibus
ejus, et tunc demum ex toto corde conversi ad Deum, reddamus illi
tanquam Patri nostro honorem, et cum ejus adjutorio discutiamus a nobis
vectigal et tributum diaboli, ut adipiscamur fructus spirituales, et
charitatem in operibus bonis, in eleemosynis, in visitationibus
infirmorum, in consolatione pauperum, in laudibus Dei, et orationibus
assiduis. Castores a castrando dicti, sunt etiam fibri, qui et pontici
canes vocantur.
|
|
