CAP. XIX. De lapidibus igniferis.

Sunt lapides igniferi in quodam monte Orientis, quos Graeci vocant chirobolos, id est manipulos. Dicunturque masculus et femina. In istis quando ab invicem separantur ignis non accenditur. Cum autem adinvicem casu aliquo approp cuaverint, statim in eis tantus ignis accenditur, ita ut omnia ardeant quae circa illos sunt. Unde et vos, homines Dei, qui vitam geritis monasticam, separate vos longe a mulieribus, quoniam si illis appropinquaveritis, statim noxius ignis accendetur in vobis, et consumetur omne bonum quod Christus Dominus vobis contulit. Sunt enim angeli Satanae, qui semper impugnant viros sanctos, sed et feminas castas. Memores enim esse debetis bellorum quae peregerunt sancti viri, sicut Samson et Joseph. Ambo siquidem tentati sunt per mulieres, sed alter vicit, alter victus est. Eva quoque et Susanna tentatae sunt, altera victa est, altera vicit. Ideo nolite securi esse, nec confidere in solita castitate, sed munite corda praeceptis divinis, ut vos non deterreat fallax amor mulierum, quarum peccatum ab initio, id est, ab Adam usque nunc in filios inobedientiae debacchatur, nec vos incendant opera daemoniorum.