|
Luscinia nomen est avis inde sumptum, quia cantu suo significare solet
surgentis exortum diei, quasi lucinia, est enim pervigil custos. Cum ova
quodam sinu corporis et gremio fovet, insomnem longae noctis laborem
cantilenae suavitate remittit. Et, ut mihi videtur, haec summa est ejus
intentio, ut possit, non minus dulcioribus modulis quam fomento
corporis, fetum animare atque fovere. Hanc vitam videtur ducere mulier
viduata, sed pauper et pudica, quae colum digitis trahens ut parvulis
suis victum acquirat, nocturno cantu moestitiam paupertatis demulcet, et
quamvis suavitatem lusciniae imitari non, possit, imitatur tamen eam
sedulo maternae pictatis officio.
|
|
