CAP. X. De his quibus prima littera est L.

Lac album est, parvulos nutrit, coagulatum arescit, dulce est, pingue, suave, bulliendo elevatur.

Lacryma brevis, clara, cito arescit, valida, amara et salsa.

Laguncula ex pluribus asseribus est texta, circulis ferreis constricta, spiraculum habet, vinum conservat.

Lamina tenuis est, crebris tunsionibus extenditur, aurea fuit in fronte sacerdotis, et nomen Dei tetragrammaton habuit, speciem lunae corniculatae tenens.

Lampas fragilis, subobscura, inferius stricta, superius lata, oleum continet, lucem praestat.

Lana crispa est, alba, mollis, suavis, levis, primo tondetur, post lavatur, tingitur, netur.

Lapis durus, volubilis, pedem offendit, aqua non mollescit, assidua gutta cavatur.

Later de luto formatur, igne solidatur, quadratus est, ruber, fragilis, crudus, si recens factus plus lavetur, plus sordet, domum tegit.

Lectus secretus, mollis, ornatus, tumidus, furtivus.

Leo rex bestiarum, ore fetet, ut mortuus nascitur, tertia die ad rugitum patris excitatur, vestigia delet cauda dum ab insequente premitur, ad rugitum ejus timent omnes bestiae; cum circulum cauda facit, nulla ferarum audet transire; superbus est, fortissimus, praedae semper inhaeret.

Lepus velox, in petra cubile suum collocat, debilis, crura retro longiora habet, auriculatus, non rumiminat, apertis oculis dormit.

Lex est basis super columnam, basis sub lutere aeneo, quinque panes hordeacei, mors in olla, baculus Eliae, sacerdos et levita saucium pertransiens aqua Marath, tibicines circa puellam mortuam, hemorhoissa, sex hydriae lapideae, servus summi pontificis auricula altera mutilatus.

Libanus arbor est in Arabia cortice et folio lato, thuri similis, succum emittens modo amygdali; bis in anno, autumno scilicet et vere, colligitur, inciso cortice in aestatis fervore thus candidum exit; spuma contracta et densata in vere inciso cortice rubrum exit, non comparandum priori, sed tamen odoratius.

Liber de pelle mortui animalis fit, encausto scribitur per pennam, plura folia habet, punctatur, torculari constringitur, ligatur, antiqua gesta et secreta conservat, nisi sepe aperiatur, mucessit; insignibus ornatur, sigillis clauditur, de facili coinquinatur, igne contrahitur, aqua diluitur.

Libra duas lances aequales habet, linguam superius, ubi appenditur, aequitas magis ponderosum sequitur, lites dirimit, et pondere tendit in alterutram partem cui inclinat.

Ligna setim humilia, imputribilia, incremabilia, albae spinae similia, quanto plus in igne sunt, tanto plus solidantur.

Lilium de facili pullulat, de inculta terra nascitur, in convallibus oritur, odoriferum est, candidum, clausum continet odorem, apertum effundit, sex folia habet, inter spinas crescit, virgulas et stipitem habet in medio; a spinis pungitur, et tamen candorem retinet, directum est in stipite, adustis medetur membris, eradicatum non statim marcescit, ut alii flores.

Lima dentata est, acuit ferrum, et dum acuit trahitur, et retrahitur, seipsam consumit rubigine.

Limen introitus domus, et ejusdem principium et finis.

Lingua modica est, labilis, velox, in humido sedet, verba format, magna exaltat, frigidum est membrum, voluntatem denuntiat.

Linum prius seritur, cito laeditur, gracile est et rarum, operitur propter volucres, molle colligitur in fasciculos, in aquam mittitur, ad solem siccatur, multis tunsionibus albescit, et varium colorem deponit, teritur, et a stupa separatur, netur, nodatur, evolvitur, iterum lavatur et in telam orditur.

Locusta sordes lavat, se ipsam sordidat, aquae colorem addit, cum nascitur vocatur bruchus, cum formatur, achelabus, cum perficitur, locusta, altera alteram devorat, in hieme latet, in aestate salit, crura habet retro longiora.

Lorica diversis circulis innectitur, corpus tegit et munit, ferrea est et ponderosa, jacendo fit rubiginosa.

Lucerna modicam lucem praestat, de testa figuli fit, quae magna fracta apparet.

Lucifer stella matutina mane oritur, rutilantem diem nuntiat, tenebras fugat.

Luna lumen habet a sole, de nocte lucet recedentibus aliis, inferior est, et propior terrae aliis, recedente sole, sola dat lucem nocti, maculam habet, quae quanto videtur clarior, tanto macula est major, rotunda est, quandoque corniculata, per tempora crescit et decrescit, cito explet cursum suum, permagna est, et tamen parva videtur.

Lupus fetidus, rapidus, crudelis, absentiam canum et pastorum considerat, caulis ovium insidiatur, horrendum ululat, prius visus quam videat non nocet, prius videns vocem aufert.

Luter erat aeneus ad ostium tabernaculi, labium habebat per circuitum desuper, aquam continens ad lavandos sacerdotes, basim subtus habens in directa linea longa et plana.

Luxuria gratuita tollit, animam inficit, corpori morbum paralysis ingerit, et caecitatem oculis, corpus inquinat, famam deflorat, pecuniam tollit, inimica est proximo, fetet Deo, placet diabolo, odibilis angelis, ejus ignis descendit in infernum, fumus ejus vindictam petens ascendit in coelum.