|
Nardus herba folio presso et parvo. Ejus cacumina in aristas se
spargunt, ejus spicas et folia ad conficiendum nardum deponunt
pigmentarii; calida herba est et odorifera.
Naris directa, concava, spirat, odorem sentit.
Nasus directus, planus, candidus. In eo maxima parte consistit species
faciei; spiritum emittit per nares.
Natans corpus in aqua habet caput supra aquam, et pedes movet, fluctus
retro jacit.
Navis in principio et in fine est angusta, in medio lata et onusta,
super aquas fertur, perforata submergitur, malum habet, velo concitatur,
gubernaculo regitur, anchora retinetur, qua non munita vento movetur;
scopulis confringitur, hauritoriis purgatur, fluctus premit et frangit,
fluctibus undique tunditur.
Nauta in fine navis residet, puppim attente respicit, clavum regit, viam
considerat et metuit, tempestatem formidat, navem omni tempore lustrat,
ne alicunde laesa sit, plus justo eam non onerat, vilibus induitur, in
portu mercedem expetit.
Nebula ab humore oritur, late spargitur, frigida est, ascendens pluviam
nuntiat, calore solis dissolvitur; descendens serenitatem signat, immota
manens obscuritatem.
Nicticorax in domibus habitat et muris, de nocte volat, diem fugit.
Nidus fit avibus secretus, intus calidus, extra asper, ex multis
congestus.
Nix ex aqua induratur, candida et frigida est, cito dissolvitur, minuta
descendit, desursum venit, calore in aquam resolvitur, terram operit, et
segetem fovet
Novacula suaviter radit, acuta est, superflua incidit, firmiter in capsa
reconditur.
Novem angelorum ordines, novem leprosi curati et non reversi.
Nox obscura, quieta, frigida, in nocte lignum putridum, et vermiculus
quidam fulget, solitaria est, pigra ad operandum, importuna, periculis
et phantasmatibus plena, colorem rebus aufert, stellis illuminatur.
Nubes leves sunt, pluviam nutriunt, obscurae sunt et veloces.
Nutrix infantem lactat, custodit, dulciter tractat, diligenter portat,
esculatur, cibos praemandit, infirmitates ejus sustinet, a fletu
promissis et minis retrahit, ire et loqui docet, et praeambulat
quocunque eat, illi osculum dirigit, aliquando permittit eum cadere ut
laesus iterum cadere caveat, iratum mulcet, cum lacrymatur oculos
tergit, offensum revocat, in sinum levat.
Nux corticem amarum habet, testam duram, pabulum praestat, nucleum habet
dulcem, suave lumen ministrat, vel accommodat.
|
|
